Dagblogg Steins

Eins og áður hefur komið fram leggur Dagbloggið mikla og ríka áherslu á öryggismál og hefur undangengin misseri gert mikilvægar ráðstafanir í því skyni að óprúttnir aðilar ógni ekki öryggi starfsmanna og notenda Dagbloggsins. Þetta hefur ekki farið fram hjá notendum síðunnar. Þrátt fyrir þetta er full ástæða til að ætla að stundaðar séu skipulegar iðnaðarnjósnir í því skyni að fá leynilegar upplýsingar um hugbúnað og allt það flókna tölvu- og netkerfi sem Dagbloggið stendur fyrir og rekur. Ekki er hægt að rekja það allt saman í smáatriðum enda um algert trúnaðarmál að ræða.

Það var því litið grafalvarlegum augum þegar fulltrúar í öryggismálanefnd Dagbloggsins uppgötvuðu að samkeppnisaðilar okkar hafa komið fyrir LEYNILEGRI EFTIRLITSMYNDAVÉL

HÉR

fyrir utan höfuðstöðvar Dagbloggsins í Kaupvangstræti 23 á Akureyri.
Hverjir þessir aðilar eru er erfitt að svara en málið er í rannsókn hjá Rannsóknardeild Lögreglustjóraembættisins á Akureyri, Vísindasiðanefnd og persónuvernd.
Allir þeir aðilar sem geta gefið upplýsingar um hverjir standa á bakvið þessa hættulegu starfsemi eru beðnir um að upplýsa okkur um það sem fyrst. Fulltrúar öryggismálanefndar vilja að svo komnu máli ekki tjá sig mikið um gang rannsóknarinnar enda hún á frumstigi en grunur beinist að nýstofnuðum skóla hér á Akureyri, RES, enda tenging á njósnamyndavélina á heimasíðu þeirra. Þessi stofnun virðist tengja anga sína víða um heim og hafa sérstakan áhuga á endurnýtanlegum orkugjöfum enda hefur Dagbloggið einatt verið knúið af slíkri orku og gert margar tilraunir með slíkt.